Madaxweynaha oo Dhagax Dhigay Mashruuca Gateway Complex…
Madaxweynaha Soomaaliya ayaa si rasmi ah u dhagax dhigay mashruuca casriga ah ee Gateway Complex, kaas oo loo qorsheeyay inuu noqdo xarun ganacsi iyo adeegyo casri ah oo isku xira dhaqaalaha gudaha iyo kan caalamiga ah. Mashruucan oo laga hirgelinayo caasimadda ayaa ka kooban dhismayaal dhaadheer, xarumo ganacsi, hoteello heer caalami ah, iyo goobaha madadaalada, taas oo sare u qaadaysa bilicda magaalada iyo kobcinta dhaqaalaha dalka.
Mashruuca Gateway Complex wuxuu muhiim u yahay maalgashiga iyo kobcinta fursadaha shaqo ee dalka. Madaxweynaha ayaa sheegay in mashruucan uu astaan u yahay dib-u-dhiska kaabeyaasha dhaqaalaha Soomaaliya iyo isku xirnaanta ganacsiga gobolka. Sidoo kale, wuxuu ku booriyay ganacsatada iyo hay’adaha maaliyadeed inay sii xoojiyaan taageerada mashaariicda noocan oo kale ah, si loo hubiyo horumarka waara ee dalka.
Xafladda dhagax-dhiga waxaa ka qayb galay mas’uuliyiin sare oo ka tirsan dowladda, wasiirro, xildhibaano, ganacsato caan ah, iyo maamulka shirkadda Riverside Holding, oo hoggaaminaysa mashruucan. Waxaa sidoo kale goobjoog ahaa Guddoomiyaha Rugta Ganacsiga Soomaaliyeed, qaar ka mid ah maamulka sare iyo hawlwadeennada Premier Bank, oo bogaadiyay horumarka mashruucan. Dhismaha Gateway Complex wuxuu ka tarjumayaa iskaashiga ganacsatada Soomaaliyeed iyo maalgashadayaasha caalamiga ah, iyadoo si gaar ah loo ammaanay hufnaanta iyo aragtida horumarineed ee Riverside Holding.
